Anleggskonsulent i Hordaland fylkeskommune, Tore Andersen, opplyser at det er laga eit forenkla søknadsskjema som kan fåast hos kulturkontora i den enkelte kommune, eventuelt ved idrettskontoret i fylkeskommunen.
Ingen søknadsfrist
- Dette er ei ny ordning i år og går ut på at velforeiningar, idrettslag, burettslag, kommunar, fylkeskommunar, lutlag eller andre samanslutningar kan søkje om midlar til å byggje mindre kostnadskrevjande nærmiljøanlegg. Vi har ingen søknadsfrist. Søknadene blir behandla i den rekkefølgje dei kjem, men vi vil sjølvsagt gjere faglege vurderingar av søknadene. Vi kan og love svært kort behandlingstid, berre nokre få veker, slik at utbygginga kan skje i haust, seier Andersen.
Maksimalt 80.000 kroner
Det kan søkast om inntil 50 prosent av kostnaden. Maksimal kostnad er 80.000 kroner.
Andersen understrekar at du ikkje kan søke om midlar til å byggje reine leikeplassar, sandkassar, disser, sklier, etc. Derimot kan du få pengar til aktivitetsflate for til dømes ballspel og sykling. Det må vere eit formål som fremjar fysisk aktivitet.
I alt har Kulturdepartementet sett av 10 millionar kroner til føremålet i år.
Interesserte søkjarar kan først ta kontakt med kulturkontoret i heimkommunen. Der får ein nærmare informasjon og søknadsskjema. Kommunen må og skrive under på søknaden som skal sendast til idrettskontoret i Hordaland fylkeskommune, Postboks 7900, 5020 Bergen.
Nærmare informasjon kan ein og få hos idrettssjef Tore Alfstad eller anleggskonsulent Tore Andersen i Hordaland fylkeskommune på telefon 55 23 92 82.
Informasjon, søkjarhefte og søknadsskjema er og lagt ut på nett på idrettssidene til Hordaland fylkeskommune:
www.hordaland-f.kommune.no/planogmiljo/idrett/spelem/forenklnma.htm
Det finst og informasjon hos Kulturdepartementet på www.odin.dep.no/kd/norsk/idrett
Bjarte Brask Eriksen