Fylkesutvalet rår til at Flonikollektivet får auka sitt budsjett med 337 000 kr og at Bergen kommune skal få ei tilskot på 800 000 kr til drifta av Årstad skole. Tilleggsløyvingskontoen til fylkesutvalet vert tilrådd styrkt med 283 000 kr
Fylkesutvalet rår til at kortsiktige og langsiktig utlån på vel 3 mill. kr til Framnes kursted (biletet), vert avskrivne som tapt.
Den tidlegare varsla tilleggsløyvinga på 64 mill. kr i regionsjukehustilskot vert no formelt innarbeidd i budsjettet til Haukeland sykehus.
På investeringsbudsjettet for i år rår fylkesutvalet til at det vert løyvd 500 000 kr til bygging av to hyblar i Olav Bjordalsvei til bruk i barne- og ungdomsvernet.
Lån til Lyngheisenteret
Fullfinansieringa av Lyngheisenteret i Lindås er enno ikkje i orden. Fylkesutvalet rår med 13 mot to røyster (Frp) til at det kortsiktige lånet på 18,6 mill. kr som fylkeskommunen har gjeve, vert gjort om til eit langsiktig lån.
Lyngheisenteret er førebels ikkje i stand til å betala dette lånet tilbake. Fylkesrådmannen skriv i saksutgreiinga at det enno er for tidleg å avskriva heile kravet.
Gulen og Masfjorden Utbyggingsselskap (GMU)
Fylkesutvalet går med 13 mot to røyster (FrP) inn for at det ansvarlege lånet på 2,0 mill. kr som Hordaland fylkeskommune har gjeve Gulen og Masfjorden Utbyggingsselskap, vert konvertert til aksjekapital og kan skrivast ned med inntil 50 % ved overføring til overkursfond. Fylkesutvalet legg også til grunn at det ikkje vert retta emisjon mot fylkeskommunen som eigar ved innhenting av ny kapital i GMU.
Frp fremja sitt eige forslag som lyder: «Fylkestingt føreset at refinansiering av selskapet Gulen og Masfjorden Utbyggingsselskap A/S er aksjeeigarane sitt ansvar. Skal gjelda nedskrivast, ved eventuell akkord, må alle långjevarane delta etter sin part av gjelda.» Forslaget fekk Frp sine to røyster.
Ølen vgs. gratis til Rogaland
I samband med at Ølen kommune frå 1.1. 2002 vert overført til Rogaland fylke, rår fylkesutvalet til at Ølen vidaregåande skule vert overført vederlagsfritt til Rogaland fylkeskommune. Overføringa omfattar også tannklinikken i Ølen og Hordaland fylkeskommune sitt innskot i den kommunale idrettshallen.
Totalkostnaden med bygningane som vert overførde til Rogaland, var 54,8 mill. kr då dei vart tekne i bruk i 1989. Heile summen var finansiert med lån som vart nedbetalt på 12 år. Normal avdragstid på skulelån er 20 år. No er lånet nedbetalt. Fylkesrådmannen skriv i saka at dersom avdragstida hadde vor lenger enn 12 år, ville det vore naturleg at Rogaland fylkeskommune hadde overteke restgjelda ved overføringa av skulen.
Stanley Hauge