Fylkestinget har vedteke at Flonikollektivet får auka sitt budsjett med 337 000 kr og at Bergen kommune får eit tilskot på 800 000 kr til drifta av Årstad skole. Tilleggsløyvingskontoen til fylkesutvalet vert styrkt med 283 000 kr
Fylkestinget vedtok at kortsiktige og langsiktig utlån på vel 3 mill. kr til Framnes kursted, vert avskrivne som tapt.
Den tidlegare varsla tilleggsløyvinga på 64 mill. kr i regionsjukehustilskot er no formelt innarbeidd i budsjettet til Haukeland sykehus.
På investeringsbudsjettet for i år vedtok fylkestinget at det vert løyvd 500 000 kr til bygging av to hyblar i Olav Bjordalsvei til bruk i barne- og ungdomsvernet.
Lån til Lyngheisenteret
Fullfinansieringa av Lyngheisenteret i Lindås er enno ikkje i orden. Fylkestinget vedtok at det kortsiktige lånet på 18,6 mill. kr som fylkeskommunen har gjeve, vert gjort om til eit langsiktig lån.
Høgre føreslo at kravet rekneskapsteknisk skulle skrivast ned til 9 mill. kr. Fordringa mot Lyngheisenteret ville uavhengig av denne nedskrivinga verta ståandes på 18,6 mill. kr, sa forslagsstillar Tom-Christer Nilsen (H). Forslaget fekk 24 røyster (H, Frp, uavh.) og fall.
Fremskrittspartiet føreslo at fylkeskommunen skulle avskriva det kortsiktige kravet overfor Lyngheisenteret vert avskrive som tap på årets rekneskap. Forslaget fekk fem røyster (Frp) og fall.
Gulen og Masfjorden Utbyggingsselskap (GMU)
Fylkestinget vedtok at det ansvarlege lånet på 2,0 mill. kr som Hordaland fylkeskommune har gjeve Gulen og Masfjorden Utbyggingsselskap, vert konvertert til aksjekapital og kan skrivast ned med inntil 50 % ved overføring til overkursfond. Fylkestinget legg til grunn at det ikkje vert retta emisjon mot fylkeskommunen som eigar ved innhenting av ny kapital i GMU.
Fremskrittspartiet fremja sitt eige forslag som lyder: «Fylkestingt føreset at refinansiering av selskapet Gulen og Masfjorden Utbyggingsselskap A/S er aksjeeigarane sitt ansvar. Skal gjelda nedskrivast, ved eventuell akkord, må alle långjevarane delta etter sin part av gjelda.» Forslaget fekk tolv røyster (Frp, uavh, 1 Krf).
Ølen vgs. gratis til Rogaland
I samband med at Ølen kommune frå 1.1. 2002 vert overført til Rogaland fylke, vedtok fylkestinget at Ølen vidaregåande skule vert overført vederlagsfritt til Rogaland fylkeskommune. Overføringa omfattar også tannklinikken i Ølen og Hordaland fylkeskommune sitt innskot i den kommunale idrettshallen.
Roald Steinseide (Frp) og Hildur Larsen (uavh.) føreslo at fylkestinget skulle vedta at fylkesrådmannen skulle forhandla med Rogaland fylkeskommune om kompensasjon for overføringa av Ølen vgs. Kompensasjonen må stå i høve til bokført verdi på ca. 40 mill. kr, heiter det i forslaget. Forslaget fekk 14 røyster (Frp, uavh., 3 Krf) og fall.
Totalkostnaden med bygningane som vert overførde til Rogaland, var 54,8 mill. kr då dei vart tekne i bruk i 1989. Heile summen var finansiert med lån som vart nedbetalt på 12 år. Normal avdragstid på skulelån er 20 år. No er lånet nedbetalt. Fylkesrådmannen skriv i saka at dersom avdragstida hadde vor lenger enn 12 år, ville det vore naturleg at Rogaland fylkeskommune hadde overteke restgjelda ved overføringa av skulen.
Vil berga skulefonda
I samband med at fylkeskommunen går mot eit rekneskapsunderskot i år, krev rekneskapsreglane at ubundne fond må gå til dekking av underskot. Dette vil føra til at skular som har opparbeidd seg fond t.d. gjennom oppdragsverksemd, vil måtta la desse fonda gå til dekking av det samla underskotet i fylkeskommunen.
Eit forslag frå Knut Mæstad (Krf) om at det må arbeidast for å få godkjenning for at desse fonda framleis skal kunna nyttast på den einskilde skule, og ikkje gå til underskotsdekking, vart oversendt fylkesordføraren.
Stanley Hauge