Fylkesutvalet peikar på at vald mot kvinner i familiesituasjon diverre er blitt eit stort problem. På Austlandet og i Trøndelag er det sett i gang spesialiserte behandlingsopplegg for ”menn som slår”. No skal Hordaland fylkeskommune saman med Bergen kommune få i gang tilsvarande behandlingsopplegg. Fagmiljøet ved Sandviken sykehus skal ha sentral rolle i behandlingstilbodet.
Likestilling på arbeidsplassen
Andre tiltak som fylkesutvalet prioriterer går på å få begge kjønn representert i alle utval, å styrkje arbeidet med likestilling på arbeidsplassen, få betre fordeling av kjønn innan utdanning, få fleire lærlingplassar i utradisjonelle yrke, prioritere kvinner sine kvardagslidingar og betre formidling av forsking innan kjønns- og likestillingsspørsmål.
Fylkesutvalet ber og om at det statlege helseføretaket for region vest iverkset arbeidet med statistikk, resultatmål og anna beslutningsgrunnlag som synleggjer forskjellar mellom kjønn i behov, tilbod og resultat innan deira ansvarsområde.
Bellaprosjektet
Etter forslag frå Trude Drevland (H) vedtok fylkesutvalet å satse vidare på å betre arbeidsmiljøet i pleie- og omsorgssektoren, det såkalla Bellaprosjektet. Dette vart sett i gang i 1999 og skal førast vidare utover 2001. Drevland peikar på at belastningslidingar i helsevesenet er ei kontinuerleg utfordring for fylkeskommunen som arbeidsgjevar.
Høgt ambisjonsnivå
Den første handlingsplanen for likestilling vart vedteke av fylkesutvalet i februar 1998. Fylkesutvalet skal i eigenskap av likestillingsutval gje føringar for framdrifta av arbeidet med iverksetjing av planen. Den første oppfølgingsrapporten vart lagt fram i april 1999. Framdrifta har vore ujamn. I den andre oppfølgingsrapporten som no blir lagt fram, er det lagt opp til eit relativt høgt ambisjonsnivå.
Les heile pressemeldinga frå fylkesutvalet
Bjarte Brask Eriksen